4 Pautes, era associacion amiga des animaus dera Val d'Aran

Eth passat deseme se comencèc a crear ua naua associacion fòrça necessària ena Val d’Aran. Se tracte dera Associacion Amics des Animaus 4 Pautes, que se dedique a prestar ajuda a toti aqueri animaus abandonats en carrèr o qu’era gent, dempús d’auer-les, ja non vò per quinsevolh motiu.

Enquiara, aguest servici non estaue cobèrt per cap auta entitat en nòste territòri e per aquerò, encara qu’era associacion pòrte pògui mesi en foncionament dejà an fòrça trebalh e diuèrsi animaus ath sòn cargue.

Per ara, 4 Pautes non compde damb cap espaci pròpriaments sòn a on sauvar as gossets e gats que cueden, per aquerò, enquia qu’es administracions non les faciliten un, foncionen gràcies a un hilat de cases d’acuelhuda.

An fòrça necessitat de voluntaris entà acuélher as animalonhs pendent un temps enquia trapar-les ua familha definitiua. Mès tanben se les pòt ajudar de moltes autes manères.

Era foncion que desvolòpen es fondadores, sòcis e sòcies e voluntaris ei transcendentau tad aguesti gats e gossets, mès non mos cau desbrembar qu’encara e que i agen associacions que cueden as animaus abandonats eth problèma residís enes alarmants donades d’abandonament de mascòtes que se dan en tot er estat, amassa damb era pòga conscienciacion dera esterilizacion des animaus. Dus problematiques còntra es que luten 4 Pautes e era rèsta d’associacions que trebalhen altruistament entà dar ua vida milhor ad aguesti peluts.