Vielha e Mijaran a premanit eth calendari esportiu de 2020, qu'aurà ua repercussion de mès de 3.000.000€ en municipi

23/10/2019

Er Ajuntament de Vielha e Mijaran a premanit eth calendari esportiu der an 2020. Coma ei abituau, s'a establit un calendari esportiu fòrça complèt que generarà ua grana repercussion economica en conjunt deth sector toristic deth municipi, pr'amor que pendent fòrça dimenjades calerà compdar damb milers d'esportistes, acompanhadi pes sòns familiars e acompanhants.

En 2020, aguest calendari esportiu presente diuèrses nauetats, en tot èster era mès importanta era Val d'Aran by UTMB pendent eth 3 e eth 5 de junhsèga, damb era preséncia de quate mil participants. Aguesta competicion, qu'ei includida laguens deth principau circuit d'Ultra-trails internacionau, ei formada per 3 distàncies: 55, 101 e 160 kms, en tor recórrer bona part dera orografia dera Val d'Aran, e que liurarà un bilhet dirècte ara celebracion dera Ultra-Trail Mont Blanc tà toti es qui la poguen finalizar.

Ua auta des nauetats ei era Transpyr Coast to Coast, qu'aurà lòc es dies 17 e 18 de junh en Vielha e Mijaran. Aguesta pròva transfronterèra artenh era 11au edicion, en tot començar eth 14 de junh en Saint-Jean-de-Luz (Pirinèus Atlantics) e que finalize en Roses (Còsta Brava de Girona) eth 20 de junh. E tanben se celebrarà era Vielha Cycling Tour, ua pròva ciclista que recorrerà bona part des paisatges de montanha pendent eth 25 de junhsèga. Toti aguesti eveniments refortilhen a Vielha e Mijaran coma municipi de referéncia de montanha enes Pirenèus, en tot acuélher competicions de gran nivèu.

En calendari tanben i son previstes es tradicionaus pròves esportives abituaus d'auti ans, coma era Pedals de Foc Non Stop, que cada an apròpe a mès de mil ciclistes pes montanhes deth territòri e qu'a Vielha coma lòc de gessuda e d'arribada. Enguan aguesta pròva arribe ara 15au edicion, en tot èster assolidada coma eth Campionat Europèu d'Ultramarathon.

Un aute des eveniments abituaus ei era Trail Vielha-Molières, qu'en 2020 celebrarà era 4au edicion, en tot supausar ua des granes cites esportives der an, e que tanben apròpe a mès de mil corredors.

Era RodiBook ei, tanben, un des eveniments de referéncia, en tot trauessar bona part des Pirenèus de França, Aragon e Catalonha, e qu'a Vielha coma lòc de gessuda e d'arribada. Cada an, mès de 800 motoristes participen d'aguesta pròva qu'artenh fòrça reconeishement.

Ath delà, tanben cau remercar era celebracion d'auti eveniments fixes e qu'a menor escala, tanben son fòrça importants, coma son: es 30 Ores de Fotbòl Sala-Vila de Vielha, era Nocturna de Vielha, era Corsa e Caminada des 15 Pòbles, era Vertical Aran, era Bonaigua Gran Fondo, Era Roda, era Corsa dera Hemna, eth Val d'Aran Walking Festival e era Hard Bike.

“Vielha e Mijaran ei sinonim d'espòrt. Des der Ajuntament aufrim un an mès, un calendari esportiu fòrça complèt ara nautada de çò que merite eth nòste municipi, en tot méter amassa espòrt e montanha,  deth quau s'en beneficie eth conjunt deth sector toristic”, comente eth dusau tinent d'alcalde e còsso d'espòrts, Alberto López. E hig que “auem pròves enes que participen mès de mil esportistes, en tot confirmar que Vielha e Mijaran ei un des principaus referents esportius de montanha enes Pirenèus”.

HÒNT: AJUNTAMENT DE VIELHA E MIJARAN

 

Laura Rodríguez