Polemica ena Val d’Aran pr’amor que segontes a explicat Convergéncia Aranesa en plen deth Conselh Generau en çò deth Senhor d’Arròs d’aguest madeish maitin, diuèrses persones deth territòri non an pogut convalidar eth sòn títol d’aranés en auer cambiat era sua actuau distincion. Çò qu’abans supausaue un nivèu C, per exemple, aué dia se nomente B.2 e per çò qu’a comentat eth grop dera oposicion i a quauqui casi enes que non s’a convalidat era titulacion e se les demane de presentar-se un viatge mès ad aguest cors.

Ath delà, tanben an mostrat era sua preocupacion perqué laguens d’aguesti madeishi corsi d’aranés, a demorat gent dehòra pr’amor que non i a pro professorat entà atier es sollicituds de persones que vòlen apuntar-se.

Es corsi d’aranés an auut un gran succès e s’a auut de hèr un sortèg en diuèrsi nivèu pr’amor qu’era demanda superaue era aufèrta.