Cultura
Naut Aran regularà 3 parcatges en sòn municipi
Enes poblacions de Garòs, Arties e Salardú
Er Ajuntament de Naut Aran a aprovat iniciaument era modificacion dera ordenança numerò 6 reguladora dera taxa entar estacionament enes parcatges e vials publics de Naut Aran. En aguest sens, en mes de noveme de 2023 se hèc ua prumèra ordenança reguladora e, ara, en tot demanar un informe tecnic s’a prenut coma pròva pilòt tres estacionaments enes poblacions de Garòs, Arties e Salardú entà iniciar-la.
Aguesti terrens son actuauments logadi per part deth consistòri a particulars e, per tant, generen un còst ar ajuntament e entà poder mantier-les s’a decidit d’emplegar aguesti espacis coma ua prumèra pròva de regulacion de parcatge entà qu’es persones que residisquen dehòra deth municipi poguen accedir ad aguesti emplaçaments damb es sòns veïculs en tot pagar un prètz per ora.
Çò qu’a aprovat Naut Aran iniciaument ei que se crube un prètz de 0,30 € per ora en aguesti endrets sense auer en compde era prumèra ora que serà gratuïta. S’accedirà ad aguesti parcatges mejançant un sistèma de regulacion per parquimètre, qu’aufrirà un tiquèt e, en voler gésser, s’aurà d’abonar eth prètz totau e auràn un maximom de 5 menutes entà deishar eth parcatge.
Eth baile de Naut Aran, César Ruiz-Canela, destaque que “es vesins que paguen er impòst de circulacion en Naut Aran non auràn d’abonar cap tipe de prètz entà accedir ad aguesti parcatges. Era rèsta de persones dera Val autant coma toristes que venguen de d’auti emplaçaments auràn de hèr efectiu eth pagament d’aguesti 0,30€ per ora damb era prumèra ora gratuïta”.
Era intencion deth consistòri ei qu’aguesta mesura pogue iniciar-se de cara ad aguesta sason d’iuèrn en tot auer en compde qu’ei ua des que mès afluéncia de torisme i a ena zòna. Aguesti endrets generarien cadun ath torn de 100 places de parcatge.