Era poblacion de Les a tornat a gaudir dera Crèma der Haro en sòn municipi. 

Pendent tota era jornada s’anèc apropant fòrça gent en tot congregar-se ena Plaça deth Haro d’aguest endret entà poder contemplar dera milhor forma possible aguesta tradicion qu’esdevenguec Patrimòni Immateriau pera UNESCO des der an 2015 amassa damb eth Taro d’Arties e d’autes hèstes deth huec deth Pirenèu.

Coma ei d’abituda, eth grop de musica Sarabat siguec er encuedat d’amenizar era jornada damb es sues tradicions cançons en aranés qu’es vesins e visitants cantauen. Ath pas des menutes, s’i somauen es Corbilhuèrs de Les autant coma es halhaires en tot mostrar un gran espectacle.

Aguest ei er auantdarrèr acte deth cicle des hèstes deth huec pr’amor qu’entà Sant Pere, eth Haro que siguec shasclat setmanes endarrèr serà Quilhat e per tant serà eth que cremarà er an que ven.

Eth Haro, qu’enguan mesuraue 10 mètres e 60 centimètres s’alonguèc fòrça mès fin finau s’artenhec que queiguesse en tot arrincar fòrtes trucades de mans entre es persones amassades en Les damb eth prètzhèt qu’es sòns desirs poguessen esdevier ua realitat e tà aluenhar es maus esperits un an mès.