Dejà s’a inaugurat era exposicion d’art sacre aranés Aran Me Fecit ena glèisa de Sant Joan d’Arties. Era sua organizacion a anat a cargue deth Conselh Generau, amassa damb er Avescat d’Urgelh, Musèus dera Val d’Aran, era Escòla Superiora d’Arquitectura dera Universitat Rovira e Virgili e era Escòla Superiora d’Arquitectura dera Universitat Internacionau de Catalonha.

Per prumèr viatge, en Aran Me Fecit, s’i expòsen era planimetria, fotografies e documentacion sus 42 glèises e capèles araneses. Ua polida recompensa a un gran trabalh que s’a alongat bèri ans.

Es glèises araneses, fòrça d’eres d’origina romanica, son documents vius dera istòria e d’ues tecniques arquitectoniques e artistiques emplegades des deth sègle XI. Gràcies as tecniques topografiques damb escanèr làser terrèstre, s’a pogut auançar en aguest projècte innovador e conéisher més era istòria dera Val.

Era importància deth trabalh qu'arrecuelh per prumèr còp era dimension der Art Sacre dera Val d’Aran se completarà damb era edicion d’un libre. Aquiu se mostrarà er estat actuau de tot aguest auviatge damb articles de referéncia.

Eth libre serà publicat en lengua aranesa e includirà un mapa damb planimetria e fotografies damb detalhs des glèises dera Val d’Aran.

En çò que tanh ara exposicion, se poderà visitar enquiath 27 d’abriu de deluns a dissabte de 17.00 a 20.00 ores ena glèisa de Sant Joan d’Arties.