Cultura
Hèsta d'Aran reivindicativa en tot demanar mès competéncies e preséncia d'Aran en Catalonha
Damb era preséncia deth President deth Parlament, Josep Rull e era Vicepresidenta deth govèrn en funcions, Laura Vilagrà
Era Val d’Aran reivindique mès competéncies, finançament e era eleccion dirècta d’un representant pròpri en Parlament de Catalonha damb eth que aurie d’èster un districte electorau pròpri.
Son es granes demanes que s’ha reivindicat a trauès dera Sindica d’Aran, Maria Vergés, e qu’an estat rebudes, entre d’auti, peth President deth Parlament de Catalonha, Josep Rull o era vicepresidenta deth govèrn en funcions, Laura Vilagrà. Aguestes dues darrères figures, s’an comprometut a seguir trabalhant peth ben d’Aran e des sòns ciutadans damb eth prètzhèt de desplegar era Lei d’Aran en toti es sòns airaus e negociar un finançament mès ambiciós.
Pendent er acte institucionau s’a guerdonat era Associacion de Donants de Sang dera Val d’Aran en sòn 20au aniversari en tot esdevier un des hilats associatius mès importanti deth territòri perqué organizen entre 4 e 5 donacions ar an. Eth prèmi l’a remassat era sua presidenta, Loïsa Estévez, qu’a destacat eth papèr qu’afronten an darrèr an e damb era reivindicacion que cau un relèu generacionau entà qu’aguest collectiu pogue gésser endauant.