Ua flaira dejà desvelhaue er apetit a tot aqueth qu’eth darrèr dissabte ath meddia se trapaue en tot passejar per Arties. Era arrason, era celebracion d’ua naua edicion d’Era Òlhada, era hèsta gastronomica entà gaudir damb es 5 sentits.

Era associacion d’empresaris d’Arties, damb era collaboracion der Ajuntament de Naut Aran e era EMD d’Arties, a organizat un an mès aguesta mòstra dera codina tipica aranesa. Enguan, se podèren aquerir es tiquets a un simbolic prètz de 5 èuros.

Era protagonista der eveniment, coma non poirie èster de ua auta forma, era òlha aranesa.

Era Òlhada se amièc a tèrme ena Sala Polivalenta d’Arties, a on desenes de vesins, vesies e visitants s’amassèren entà gaudir des delicies araneses.

Era òlha aranesa ei, per antonomasia, eth simbèu gastronomic deth nòste país. Un plat fòrça energetic e damb un pialèr d’ingredients.

E cèrtaments, a punt quedèc entà que toti es assistents poguessen passar un inmilhorable dissabte d’Òlhada.