Es pròplèu 7 e 8 de març, eth Palai de Gèu de Vielha serà eth scenari dera celebracion deth Campionat de Catalonha de patinatge artistic sus gèu, en quau se demore era participacion d'enquia 150 patinadors.

Aguesta pròva acuelherà era participacion de totes es categories autonomiques, damb edats des des 6 ans enquias 18. Ei ua competicion Open, ena que i aurà patinadors arribadi de Madrid, Granada, València, Catalonha e es aranesi deth CEGVA, que compdaràn damb ua representacion d'un totau d'14 patinadors.

Deth 24 ath 26 d'abriu aurà lòc eth Campionat d'Espanha infantil, e per aquerò, fòrça equips vieràn a provar en Vielha es sòns programes, de manèra qu'ei assegurada ua competicion de nauta qualitat.

Autant eth dia 7 coma eth 8 de març, eth campionat començarà entàs 08:30 deth maitin e finalizarà entàs 17:30 dera tarde.

“Aguesta dimenjada, Vielha e Mijaran serà er epicentre d'ua grana competicion a nivèu de patinatge artistic sus gèu, a on se demore un campionat de nauta qualitat, damb patinadors de diuèrses regions d'Espanha”, comente eth dusau tinent d'alcalde e còsso d'espòrts, Alberto López. E hig que “arregraïm er esfòrç deth CEGVA pera sua implicacion ena organizacion d'aguest eveniment, e desiram fòrça sòrt as 14 patinadors deth club que i participaràn”.

HÒNT: AJUNTAMENT DE VIELHA E MIJARAN