Era organizacion deth Freeride World Tour a confirmat qu’eth Freeride World Tour Baqueira Beret Pro se disputarà eth pròplèu diuendres 17 de gèr. Totun, i a nauetats tanplan importantes e ei que, pr’amor de garantir era maximala seguretat des participaires dauant des condicions de nhèu actuaus que i a, s’a decidit de cambiar era ubicacion.

Per tant, non serà eth mitic Bacivèr er emplaçament a on s’haràn es baishades d’esquí e surf de nhèu masculin e femenin. De hèt, s’an desmarcat completaments deth sector de Baqueira e Beret e s’an dirigit enquias montanhes de Vielha e Mijaran. Concretaments, era pròva aurà lòc en tuc d’Auba, en ua pala nomentada la Bamba.

Malerosament, era orografia deth terren non permet era arribada de public, mès, ei previst qu’en Beret se place ua pantalha gigant tà poder seguir er eveniment en dirècte. Es actes començaràn deman madeish damb era presentacion oficiau des riders de 18:30 a 19:00 dauant der Hotèl Montarto de Baqueira. En Beret i a previst tanben un Village pendent aguesti dies e er autrejament de prèmis serà ena jornada deth dimenge.