Eth Conselh Generau demane ara Generalitat mesures urgentes tà Aran

01/03/2021

Era Val d’Aran contunhe en tot èster en punt de guardada pera nauta incidéncia qu’era Covid-19 enregistre d’ençà hè lèu un mes. 

A dia d’aué eth risc de rebròt ei de 1750 punts, quan en tota Catalonha aguest balanç ei de sonque 240 punts, ua taxa sèt viatges inferiora. 

Es pacients ingressadi ena planta Covid-19 en Espitau Val d’Aran son 7, mès preocupe er aument des contagis enes darrèri dies e com se poirie reflectir ena pression espitalària. 

Dauant aguestes preocupantes donades epidemiologiques, eth govèrn aranés a sollicitat ara generalitat de Catalonha ues demanes entà sajar de frenar eth ritme de contagis.

Arrebrembam qu’eth Departament de Salut informèc qu’era varianta britanica deth Coronavirus en Aran arribe dejà ath 92% des naui contagis. 

Ei per açò que tanben se demane eth dessenh d’un procès de desescalada especific entara Val d’Aran de cara as pròplèus setmanes. 

De moment, calerà demorar era responsa per part der executiu catalan. 

Laura Rodríguez