Ei ua des granes incognites ena Val d’Aran, e mès particularaments en municipi de Les: I aurà Crema der Haro, e Hèstes deth Huec, enguan?

Des deth Consistòri de Les encara non an prenut cap de decision oficiau, mès se trapen en contacte damb toti es collectius e agents restacadi ena organizacions des hèstes deth Huec.

Çò qu’ei segur ei qu’eth format tradicionau dera Crèma der Haro non se poirà mantier enguan, pr’amor qu’es granes aglomeracions que se formen ena plaça der Haro son totauments incompatibles damb es mesures de prevencion dera Covid-19.

Arrebrembam qu’era Shasclada auec d’èster suspenuda pendent era passada dimenjada. En sòn lòc, era Comission d’Hèstes programèc ua seria d’activitats virtuaus, coma un concors de diboish o eth Pinchopote desde casa.

En aguest sens, des der Ajuntament s’avalore era possibilitat d’ahíger aguesta idèa d’activitats adaptades ara situacion que se viu, en cas que non siguen possibles es tradicionaus activitats des Hèstes de Les.  

Totun, encara non i a arren de definitiu, e calerà demorar a que se prengue ua decision ferma tà hèr-mos ua petita idea de com seràn enguan era Crema der Haro e era Hèsta de Les.