Er escrivan José Luis Muñoz a presentat era sua òbra "El mokorero del Okavango"

28/11/2018

Damb motiu deth 17au anniversari dera bibliotèca Generau de Vielha, a agut lòc era presentacion deth nau libre de relats der escrivan José Luis Muñoz, originàri de Salamanca mès afincat en Bossòst des d’hè quauqui ans. Eth sòn títol, “El mokorero del Okavango”, ja mos da ua petita pista d’ua des tematiques d’aguest nau projècte.

Aguesta naua òbra, que Muñoz a escrit pendent bèri ans, arremasse ua barreja de genres que van des der estil romantic, ar umor e sense desbrembar era novèla nera. Aguest darrèrei er estil que caracterize ar escrivan e comissari der hestivau Black Mountain, José Luis Muñoz.

“El Mokorero del Okavango” mos hè a viatjar per diuèrsi continents a trauèrs de diferentes istòries que tostemp conviden ara reflexion deth lector.

Dempús dera presentacion d’aguesta òbra, Muñoz ja n’a premanida ua auta, “La diosa de hielo”. Ua novèlla ambientada ena preistòria e qu’ei un aumenatge qu’er autor vò hèr as novèlles classiques d’aventures en tot anar ara arrason dera evolucion der èster uman. Ua arrason que passe pera curiositat de descorbir naui mons.

Laura Rodríguez