Conferéncia "Mission complida" en aumenatge a Mn.Condò en centenari dera sua mòrt, a cargue de Mn.Amiell

27/04/2019

Era conferéncia "Mission complida" a estat un aumenatge mès a Mossen Jusèp Condò Sambeat, en tot arrebrembar eth centenari dera sua mòrt.

Organizada peth departament de Cultura e Lengua deth Conselh Generau d’Aran, era conferéncia siguec a cargue de Mossen Jusèp Amiell, ua des persones damb mès autoritat tà parlar de Mn. Condò.

Eth títol dera conferéncia "Mission complida" hè referéncia a un passatge dera carta que Mn. Condò li envièc ath sòn amic Sarrieu, fondador dera Scolo deras Pireneos, pòques setmanes abantes de morir.

Es assistents ara conferéncia arreceberen coma present un punt de libre e un exemplar d'"Era Maladeta" ua legenda en vèrs qu’explique era formacion des montanhes Maleïdes.

En aguest sens, eth legat de Condò passe per poesia, literatura, teatre e tanben musica.

Jusèp Condò Sambeat ei considerat eth prumèr escrivan en utilizar er aranés coma lengua literària. Es sues òbres son tresaurs entara nòsta tèrra.

Ua persona qu’a hèt istòria en nòste país e que jamès serà desbrembada. Mission complida.

Laura Rodríguez