Era Sindica d’Aran, Maria Vergés, s’a amassat damb eth conselhèr de Politica Lingüistica dera Generalitat, Francesc Xavier Vila, entà tractar era actualizacion deth traspàs en matèria de lengua. Eth territòri compdaue enquia hè dus ans damb un pressupòst de 60.000 € que non ère pro entà desvolopar politiques actives entà estimular era lengua. Ena darrèra legislatura s’artenhec un aument de 200.000 €, totun se reclame un pressupòst de 500.000 èuros en airau de Lengua tà poder amiar endauant diuèrses accions.

Entre eres, en destaque era intencion de crear ua espècie d’escòla de formadors que dempús serien eri es que harien es classes a futuri alumnes non sonque que residissen en Aran, senon en d’auti parçans e que mòstres interés per aranés. Ath delà, tanben se vò potenciar recorsi de papèr autant coma mieis audiovisuaus e naues tecnologies entà apropar era lengua as mès joeni e que la poguen emplegar.

Aguest futurible increment ena matèria de lengua ven dat pera Naua Lei d’Aran der an 2015 e vie condicionat pera aprobacion des pressupòsti dera Generalitat.