Eth Conselh Generau d’Aran amiarà a tèrme trabalhs de manteniment e reparacion ena glèisa de Sant Esteue de Montcorbau. Es accions se centarien ena substitucion deth tet d’aguest temple religiós pr’amor que se trape en un estat fòrça maumerent.

Aguesta actuacion ère prevista en an 2023, totun se harà a compdar d’ara e pendent es pròplèu 15 dies damb un prètz totau d’ath torn de 12.000 èuros. Eth govèrn d’Aran mòstre d’aguesta forma eth sòn compromís damb es diuèrsi espacis culturaus deth territòri, perqué enes darrèrs ans s’an caracterizat pera milhora en diuèrses d’aguestes infraestructures de caire espirituau en fòrça emplaçaments d’Aran. Ua des darrères qu’ei a punt de finalizar ei tanben era reforma dera glèisa Sant Joan d’Arties a on s’abilitarà un gran espaci entà poder assolidar-la coma un des referents en airau expositiu entà acuélher mòstres temporaus.

Sant Esteve de Montcorbau ei ua glèisa d’ua sòla nau damb volta de canon leugeraments apuntada e refortilhada damb arcs toraus: demoren pìgui elements des sues origines romaniques. Er absis poligau ei d’estil gotic deth sègle XV.