Aguestes chifres corroboren era tendéncia ar ascens dera poblacion, qu'a anat creishent es darrèri ans: eth recompde en 2014 ère de 31 individus, 32 en 2015 e 41 eth 2016.

Un des hèts mès estonanti a estat eth retorn deth vielh mascle Nere (hilh de Ziva e un mascle esloven neishut en an 1997), que siguec capturat eth 1998 en Baish Aran e que hège 19 ans qu'ère en Pirenèu occidentau. Siguec fotografiat e contrastat per mòstres genetiques a finaus deth zel enes bòsqui de Vielha e Mijaran.

Aguest retorn implique era connectivitat entre es dues poblacions e era possibilitat qu'un nau mascle non emparentat damb Pyros pogue auer deishat descendència, o ac pogue hèr a compdar d’ara.

En çò que tanh ara reproduccion des ossi, enes Pirenèus an neishut 7 cadèths de 4 femelhes en 2017: 2 de Caramellita, 2 d’Isil, 2 de Plume e 1 de Chataigne. 6 d’aguesti an neishut en Catalonha; concrètaments es de Caramellita, Isil e Plume. Un des cadèths s’a localizat ena Val d’Aran, es auti en Pallars e Arièja.

Ath delà des 7 naui cadèths, que son 2 mascles, 1 femelha, e 4 damb sèxe non identificat, es 43 exemplars identificadi en 2017 se dividissen en 21 adults (7 mascles e 14 femelhes) e 15 subadults de 2, 3 e 4 ans (9 mascles, 5 femelhes e un damb sèxe non identificat).

Totun, era abséncia de donades enes darrèri 2 ans, a hèt qu'en 2017 se donguen per desapareishudi dus individus: eth mascle Moonboots e era femelha Patoune.

Per çò que tanh ath mascle Pyros, es cameres de fototrampeig lo captèren per darrèr còp a finaus de març e principis d’abriu deth 2017 en Baish Aran.

Goiat, liberat en Pallars en marc deth programa Piroslife er an 2016, dempús de passar er ostiu en França tornèc tara Val d’Aran ena tardor tà ivernar, coma ja hec eth passat iuèrn. Hè ues setmanes gessec der ivernatge e actuauments ja se tròbe en solèr francés.