Es darrèri atacs der os hèn a sautar es alèrtes en Bagergue, un des pòble que mès atacs ara ramaderia està patint. E ei que en mens d’ua setmana, er os a aucit a cinc oelhes en ua des sues finques.

Un ramadèr e vesin de Bagergue a vist dejà coma er os a aucit a dues des sues oelhes, e tres d’un companh sòn. Eth problèma, diden, pòt èster restacat damb un comportament anomal d’un des ossi, que se pense qu’ei eth responsable des atacs.

Hè pògui dies un vesin aranés filmèc un os en tot passejar-se per ua des montanhes deth Naut Aran. E ei per aquerò q’ua auta de preocupacions ei era creishenta manca de pòur per part der os d’apropar-se as nuclèus urbans. Coma a passat en aguest cas. 

Segontes es agents forestaus deth Conselh Generau, tot semble indicar que se tractarie der os Goiat, un mascle d’uns onze ans, que siguec portat as Pirinèus des d’Eslovènia en 2016. Ua pròva deth crim permeterà endonviar eth nòm der assassin que se dèc eth darrèr banquet en Bagergue sense cap d'autorizacion.

De moment, eth ramadèr afectat a pres coma mesura provisionau botjar es sues oelhes a un camp de Casau. Ath delà, ja se trape pensant en d’autes. Damb toti aguesti tragics eveniments, es ramadèrs afectats insistissen en besonh de qu’es actors politics prenguen mesures entà méter fin a toti aguesti damatges que darrèraments s'estan produsint en sector ramadèr.