Vielha hestege a compdar d’aué era sua hèsta major coma ei d’abituda en aguestes dates de principis de seteme. Enguan era tematica escuelhuda pera Comission ei era mar, que serà era merca significativa ath long de toti aguesti dies, especiaument ena net tematica deth deluns 9 de seteme a on es vesins se disfressaràn en relacion ad aguest airau.

Un des eveniments principaus ei deth nomentament e presentacion des fradins e fradines des hèstes de Vielha de 2024. Aguesta ei ua figura que se recuperèc en an 2019 e que simbolize era fraternitat que i a entre mainatges grani e petiti e eth sòn acompanhament damb eth pas des ans entà bastir ua societat milhor.

Ath delà, tanben s’an premanit d’auti actes mès sociaus coma per exemple un campionat de tennis taula, de bàsquet, gymkanes, baishada de cacharros o activitats mès culinàries coma concorsi de pastissi e tortilhes.

Eth dia centrau dera hèsta de Vielha eth dimenge dia 8 de seteme a on s’harà era benediccion deth nau drapèu ena Plaça dera Glèisa, ua gessuda en processon  des d’aqueth emplaçament enquiath Santuari dera Mair de Diu de Mijaran damb era posterior missa e Balhs Aranesi per part des Fradins de Vielha e era Còlha de Santa Maria de Mijaran.

Era hèsta de Vielha se barrarà eth pròplèu dimèrcles damb un castèth de huecs artificiaus que se poirà contemplar des de quinsevolh part deth cap-lòc deth país.