Es dificultats qu’an es persones tà accedir a ua viuenda de loguèr entà residir se generalize enes diuèrsi municipis dera Val d’Aran, a on aqueth format autant coma eth des lotjaments de caractèr toristic an experimentat un notable encariment enes darrèrs ans en aguest territòri.

Es darrères donades der Incasòl sus era quantitat mieja des fiances depausades a compde de contractes de loguèr en Aran placen era mieja enes 649 èuros mensuaus, çò que supause ua diferéncia de lèu eth 15% respècte er Alt Urgelh, a on se place enes 565.

En mercat actuauments lèu cap des pisi e viuendes que s’aufrissen jos eth format d’arrendament semblen dirigidi ath mercat de loguèr residenciau: excèpte pògues excepcions deth nivèu des 900 èuros mensuaus en Vielha, que se redusissen a dus, eth següent escalèr se trape enes 1.300 èuros mensuaus per un pis de dues abitacions e 72 mètres quarrats en cap-lòc abans de pujar as 1.500 per d’auti de tamanh similar en Bossòst e Garòs, des quaus n’i a disponibles quate, es 1.800 d’un en Salardú o es 1.900 d’un chalet en Arties, en municipi de Naut Aran.

Eth territòri sage de promòir accions envers era viuenda entà qu’aguesta situacion se pogue solventar en ua temporada d’iuèrn qu’a dia d’aué ei ua incognita se coma afectarà a nivèu des temporèrs que s’apròpen cada sason a trabalhar entà Aran.