Agricultura e ramaderia
Eth Govèrn d’Aran impulse ua modificacion des nòrmes subsidiàries tara regulacion der usatge e de bastiment admissible en terrenhs non urbanizables
20/07/2024
Aguesta modificacion preten facilitar era implantacion d’activitats agropequàries e definir e regular aguestes activitats tà explotacion de caractèr domestic en Aran
Eth Conselh Generau d’Aran impulse era modificacion des Nòrmes Subsidiàries (NNSS) de Planejament dera Val d’Aran relatives ara regulacion der usatge e bastiments admissibles en solèr non urbanizable.
Era modificacion se trape en periòde de tramitacion, qu’ara ei ena fasa d’evaluacion ambientau e qu’afectarà ara major part des municipis dera Val d’Aran.
Era sindica d’Aran, Maria Vergés, manifestaue que: “es objectius d’aguesta modificacion son facilitar era implementacion d’activitats agropequàries professionaus, en tot respóner atau as demanes deth sector ramadèr e tanben ordenar eth paisatge en tot dotar-mos des esturments que permeten recuperar era activitat tradicionau de gestion deth nòste territòri. Quauquarren qu’encaishe ath delà damb aquerò que requerís èster Resèrva dera Biosfèra dera UNESCO” .
Ei en aguest sens qu’es naues NNSS permeteràn facilitar as ramadèrs era practica des sues activitats e amendrir-ne es sues limitacions, en aquerò que tanh a superfícia e a aspècte, qu’es nòrmes actuaus impòsen as edificacions de mens dimension.
Eth conselhèr de Territòri, Francés Bruna, explicaue tanben que: “Eth dusau objectiu ei definir e regular es activitats agropequàries de caractèr domestic, sense nauta ena activitat economica d’explotacion, coma pòden èster uarts e cultius o petits ramats d’animaus”.
En aguest sens, enes naues nòrmes se prevé er emplaçament de petites casetes regulades que servisquen entar emmagazematge d’utisi tà uarts, garières o refugis tà un nombre redusit de caps de bestiar, coma oelhes o crabes.
Atau donc, damb aguesta modificacion urbanistica ena qu’an collaborat era majoritat d’ajuntaments aranesi, se seguís eth camin encetat entara melhora e ordenacion deth paisatge a trauès, non sonque dera ramaderia, se non de totes aqueres activitats tradicionaus de gestion dera tèrra que demorauen dehòra dera normativa actuau.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga