Es prumèrs indicis d’activitat d’ossi dejà an estat trapadi pendent aguesti darrèri dies ena Val d’Aran e en zònes pròplèus. Se tracte de peades ena nhèu des montanhes dera Val de Toran e dera zòna dera Bonaigua.

E ei qu’es ossi començen dejà a gésser dera ibernacion. Un hèt que des deth sector dera ramaderia dejà a desvelhat era pòur.

En çò que tanh a Goiat, aguest exemplar seguís en ibernacion ena zòna de Margalida, en Bossòst, encara que s’a enregistrat bèth movement leugèr.

Des deth Conselh Generau d’Aran s’instistís en que se harà tot çò de possibble entà hèr dehòra a Goiat s’era situacion ei parièra ara des darrèri ans, enes que s’an produsit fòrça pèrtes en sector ramadèr. Tanben s’arrebremben es mesures d’assegurança deth bèstiar mòrt.

Aguesta sòl èster era epòca en qu’es prumèri ossi abandonen es cauves d’ibernacion. Es femelhes damb cries seràn es darrères en gésser ja que demoraràn damb es cadèths pendent es prumèrs mesi ena madeisha tuta.