Agricultura e ramaderia
Era agropacion de ramats aurà tres emplaçaments enguan: Beret, Casau e Vilamòs
Vilamòs ei un nau espaci entara agropacion pr'amor qu'es ramadèrs deth Baish Aran atau ac an sollicitat entà auer eth sòn bestiar mès apròp
Aguest passat fin de setmana s’an hèt es darrères agropacions de ramat de bestiar ovin e crabum dera Val d’Aran. Era prumèra agropacion que se hec siguec era de Casau, eth passat 18 de mai. Ad aguesta s’i an hijut Vilamòs Beret.
Eth ramat de Casau pèish en entorn deth pòble tà dempús hèr eth darrèr desplaçament entath Santet de Casau, a on demorarà enquiara tardor. En aquerò que hè a Vilamòs, era agropacion se tròbe, des deth dissabte, enes entorns des prats deth pòble entara neteja des peisheus, e dempús se n’anarà entà Uishèra. En cas de Beret eth bestiar se trape en solan de Tredòs entà dempús desplaçar-se entàs prats de Beret.
Aguestes accions an un doble objectiu, en prumèr tèrme suenhar es entorns deth territòri e auer un paisatge mès similar a çò que hège hè decènnis e per un aute costat, redusir eth nombre d’atacs d’os que se poguen produsir pendent aguestes dates pr’amor que i è un pagès damb eri tot eth periòde.
Es ajuntaments de Naut Aran, Vilamòs e era EMD de Casau an cedit terrens publics entà amiar endauant aguest tipe d’accion.