Agricultura e ramaderia
Aprovada era regulacion der accès ath miei naturau d’aguest ostiu
14/06/2024
Eth plen extraordinari deth Conselh Generau d’Aran aprovèc ager era modificacion dera ordenança d’accès motorizat ath miei naturau d’enguan enes ribères damb mès afluéncia
Eth Plen extraordinari deth Conselh Generau d’Aran celebrat ager aprovèc per unanimitat era modificacion dera ordenança reguladora der accès motorizat entàs ribères de Valarties, Aiguamòg e ribèra deth Joeu, e tanben es previsions de regulacion der accès motorizat entàs airaus dera Bassa d’Oles, dera Bassa d’Arres e de Varradòs-Saut deth Pish deuant der inici dera tempsada d’ostiu, atau e coma se ven hènt enes darrèri ans.
En aguest sens, era ordenança prevé era abilitacion de zònes de parcatge tà veïculs non autorizadi e transpòrt alternatiu a disposicion des usatgèrs. Tanben se proïbirà era circulacion d’autocaravanes e caravanes pes pistes forestaus pendent era sason d’ostiu.
En zònes de parcatge obligatòri s’abilitaràn casetes d’informacion, qu’atieràn es dobtes e demanes des usatgèrs. Aguesta regulacion serà efectiva der 1 de junhsèga ath 15 de seteme.
En madeish plen s’aprovèc ua modificacion de crèdit deth pressupòst generau per valor de 2,558.500 euros. Entre es partides mès destacades s’i trapen era finalizacion deth camin ciclable, era transferéncia de capitau de Pompièrs tara crompa de tres ambulàncies, e es òbres de melhora e reabilitacion energetica dera Casa deth Senhor d’Arròs, Era prepausa siguec aprovada damb es vòts a favor d’UA e era abstencion de CDA.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga