Damb era arribada deth mes d’octubre arriben tanben es tradicionaus Hèires deth Bestiar dera Val d’Aran.

Enguan, coma tostemp aguestes hèires daràn començament damb era de Les, que se celebrarà aguest dissabte, 6 d’octubre, e que començarà damb un esdejoar aufrit peth Supermercat Boya.

Dimenge dia 7, aurà lòc era Hèira de Salardú, a on eth bestiar començarà a arribar a compdar des 9 deth maitin, er esdejoar popular aufrit per Ajuntament de Naut Aran aurà lòc tàs 9 e mieja e tàs 10:30 aurà lòc era mòstra de oelhes, vaques e shivaus.

En darrèr lòc e entà finalizar aguesta completa dimenjada, era Hèira de Vielha se celebrarà eth deluns, 8 d’octubre, e aurà lòc tanben eth 32au concors de bestiar, que s’alongarà enquiath meddia.

En aguestes hèires se pòden trapar tot tipe de productes artesanaus: hormatges, embotits, ròba o joguets, entre molti d’auti, mès çò de mès destacat ei tostemp eth bestiar, pr’amor qu’ei precisament en eres a on se mèrquen quini seràn es prètzi deth animaus pendent era tempsada.

Ath delà, cau restacar que son eveniments que cerquen reforçar era tradicionau figura deth pages dera Val d’Aran.

Fòrça decènnis avalen er èxit des Hèires deth Bestiar dera Val d’Aran, qu’arreceben cada an centenats de persones tant de laguens deth territòri coma de ues autes parts de Catalonha e França.