Exposicion "Er art dera harga" en Sant Joan d'Arties

01/07/2019

Eth passat 27 de junh s'inaugurèc en Sant Joan d'Arties era exposicion "Er art dera harga", organizada pera Fondacion Privada deth Musèu Etnologic dera Val d’Aran en collaboracion damb Musèus dera Val d’Aran.

Era exposicion se poderà visitar a compdar de diuendres 28 de junh enquiath 28 de seteme ena glèisa de Sant Joan d’Arties, sala d’exposicions temporaus deth Musèu dera Val d’Aran.

En ostiu, er orari s’amplie de deluns a dissabte, de 17 enquias 21 ores, era entrada ara exposicion ei gratuïta.

Era inauguracion compdèc damb era participacion deth sindic d’Aran, Paco Boya, e dera presidenta dera Fondacion deth Musèu Etnologic dera Val d’Aran, Rosa Mari Salgueiro, acompanhadi dera conselhèra Angelina Casas e deth baile de Naut Aran, César Ruiz Canela, entre d'auti.

Des petits talhèrs artesanaus que i auie en Aran, an gessut fòrça des elements que s'exposen. Era exposicion conten 109 fotografies que mòstren eth sòn trabalh ena harga, coma balcons, rèishes, pòrtes, hièstres, picapòrts, poms, claus, clauadores, anères, cadies, mès tanben se pòden contemplar totes aqueres airines que se tenguien enes larèrs des cases, landrèrs, amolhs, soflets, farrulhes, planches, tres pès, cremalhs, cremalhères, o entath trabalh de pagés coma horques, tenalhes, estialhes, shòla, estrius, arratèrs e utisi coma tà mercar es animaus tamb era mèrca dera casa o dera madeisha casa coma romanes.

Pendent era inauguracion dera exposicion tanben se presentèc eth nau numero dera revista Tèrra Aranesa.
Clara Villar