Eth baile de Bausen renóncie ath sòu entà rebaishar er IBI as vesins

14/10/2019

Enes tempsi que corren, non ei bric abituau escotar qu'un baile renóncie ath sòn sòu. Mès aguest ei eth cas deth baile de Bausen, José Antonio Barés, de Convergéncia Democratica Aranesa, que gessec escuelhut as passadi comicis.

Gràcies ad aguest gèst, eth municipi aranés poderà redusir es despenses deth consistòri en uns 30.000 èuros annaus.

Aguest estauviament permeterà redusir er IBI urban, en tot favorir d'aguesta manèra as vesins deth pòble de Bausen, e mès concrètaments as pensionistes, que supausen un de cada tres abitants ena localitat. Atau, er impòst de bens immòbles baisharà de 0,65 a 0,5.

Maugrat qu'era Generalitat balhe ajudes enes Ajuntaments de mens de 1500 abitants entà per'mor de retribuir cargues locaus, Bausen non i pòt optar. Eth motiu ei qu'eth pòble passèc diuèrsi ans sense rénder compdes deuant era Sindicatura de Compdes. Quauquarren que se vò resòlver damb aguesta naua legislatura.

Desbloquejar es compdes ei ara per ara era prioritat deth Consistòri de Bausen, mès tanben se trape en tot trabalhar per d’auti projèctes entath pòble.
Laura Rodríguez