Concòrdia per Aran: eth nau movement sociau aranés

22/09/2017

Aguest grop nèish coma conseqüéncia deth referendum deth pròplèu 1 d'octubre

Era Val d'Aran compde damb un nau movement sociau, sorgit a causa deth referendum d'autodeterminacion der 1 d'octubre: Concòrdia per Aran.

Aguest ei un movement non politic format per "diuèrses persones de sensibilitats fòrça diferents", segontes afirmen des dera organizacion. Concòrdia per Aran a sorgit pendent es tres darrères setmanes a causa dera "demana de moltes persones que compartissen es madeishes idees e que senten ua gran manca de representacion en aguest ahèr".

Concòrdia per Aran se dèc a conéisher en un acte qu'auec lòc eth passat 19 de seteme en Otèl Tuca de Betren. En aguest acte tres persones liegeren enes tres idiòmes oficiaus d'Aran eth manifèst dera organizacion, que cònste de quate punts:

"1.- Aguest referendum non respècte eth principi de legalitat ne, per tant, er Estat de dret en quau se base quinsevolh democràcia, e, per açò, volem hèr ua crida ara ciutadania d’Aran e as sues institucions publiques (Conselh Generau e Ajuntaments) a non participar ne collaborar en eth, pr’amor que se ac hèn legitimarien un procès que non compde damb es minimes garanties juridiques e democratiques. 

2.- Coma vesins e vesies d’Aran, non mos sentem representadi per aguest procès politic, que dividís ara societat catalana e ignòre totaument era singularitat institucionau, culturau e istorica dera Val d’Aran.

3.- Manifestam qu’era Val d’Aran ei un pòble de concòrdia, de dialòg e de soma de diuèrses origines, sensibilitats e apertenences, es quaus non pòden èster objècte de renóncia per part d’un procès unilaterau ath marge dera legalitat constitucionau e estatutària, pera quau tant Aran coma Catalonha exercissen es sòns autogovèrns.

4.- E en darrèr lòc, animam as nòsti representants publics a que, cadun d’ençà deth sòn encastre d’actuacion, contribusisquen ar entendement e, per tant, a resòlver aguesta situacion d’ençà dera politica e eth respècte era lei".

Dempús dera lectura d'aguest document, toti es assistents interessats se poderen aderir ath manifèst, tanben se pòt hèr online ena sua plana web.

Concòrdia per Aran ei un grop totaument dubèrt, "ath quau se pòt aderir quinsevolh persona, sigue quin sigue eth sòn origen, sensibilitat e apertenença".

 

 

Clara Villar