Un an mès, eth pòble de Canejan dejà a celebrat era sua hèsta mès tipica: es Barbacans. Era tarde de dissabte, 24 d’hereuèr, era Plaça deth pòble s’amplic de gent de totes es edats e condicions vestida damb es pèths e es còrnes tipiques d’aguesta celebracion.

Ath torn des 8 s’amortèren es lums deth pòble e dèc començament era desfilada des barbacans pes carrèrs de Canejan, illuminadi pes halhes e acompanhats en tot moment pes tamboraires.

Dempús de tornar ena plaça, se procedic ara crema deth pipòt de Magràs e as dances tradicionaus damb es Corbilhuèrs de Les.. Ara seguida, er Ajuntament aufric un aperitiu abantes deth sopar popular e era hèsta que seguic.

Era des Barbacans ei ua hèsta tradicionau aranesa que se perdec pendent es ans dera Guèrra Civiu, e non siguec enquia 2004 que se recuperèc. Des d’alavetz, tostemp a agut ua nauta participacion, damb preséncia non sonque des vesins e vesies de Canejan e d’auti pòbles dera Val d’Aran, senon tanben de visitants que vòlen gaudir des tradicions tipiques deth territòri.

Es vesins se senten plan capinauti d’aguesta hèsta, que dejà s’a convertit en ua celebracion fixa e demorada en calendari.