A compdar d'aguest deluns, 1 de març, entre en vigor era naua resolucion deth Departament de Salut dera Generalitat de Catalunya que permet cèrtes melhores enquiath 8 de març enes restriccions deuant dera pandémia dera COVID-19.

Des der Ajuntament de Vielha e Mijaran, en tot hèr un exercici de responsabilitat damb era situacion dera pandémia ena Val d'Aran, a on eth nivèu d'incidéncia ei eth mès naut de Catalonha, a decidit non adaptar es naues mesures dera administracion catalana enes equipaments municipaus.

Deuant dera manca d'un plan d'actuacions que permete melhorar era situacion sanitària en territòri aranés, eth consistòri s'a vist damb era obligacion de préner aguesta mesura, en tot mantier er emplec e es servicis as usatgèrs enes installacions coma a estat vigent pendent era anteriora resolucion.

“Era situacion dera pandémia ena Val d'Aran ei fòrça preocupanta e deuant dera inaccion dera Generalitat en nòste territòri, des der Ajuntament de Vielha e Mijaran mos vedem damb era obligacion de mantier era situacion enes equipaments municipaus coma establie era anteriora resolucion, sense dar un pas endauant”, comente eth dusau tinent d'alcalde e còsso d'espòrts de Vielha e Mijaran, Alberto López. E ahig que “ei urgent qu'era Generalitat prengue decisions sanitàries ath respècte, pr'amor que non podem seguir en aguesta linha, que mos place en lòc mès naut de Catalonha en nivèu d'incidéncia dera COVID-19. Non podem méter en risc ara nòsta ciutadania”.

HÒNT: AJUNTAMENT DE VIELHA E MIJARAN