Es familhes qu'an hilhs/es menors d'edat qu'an participat enes casaus d'ostiu e en activitats esportives municipaus ja pòden demanar era ajuda extraordinària qu'aufrís er Ajuntament de Vielha e Mijaran.

Aguesta subvencion ei avalorada en 20.000€ e an coma objectiu ajudar as familhes a paliar es efèctes dera crisi economica derivada dera pandémia dera COVID-19. Era ajuda, que serà deth 50% deth còst, enquia un totau de 200€ per menor e activitat, servís entà finançar es despenes correntes dera participacion enes casaus d'ostiu realizadi ena Val d'Aran pendent es mesi de junh, junhsèga e agost e es activitats esportives organizades per Ajuntament de Vielha e Mijaran enquiath 31 de deseme de 2020, atau coma es despenes corresponentes ara inscripcion des corsi o crompa de quinsevolha modalitat d'abonaments deth Palai de Gèu de Vielha des menors d'edat. 

Se poderà concedir ua ajuda per cada menor entà cadua des modalitats; ua entath casau d'ostiu e ua entara activitat esportiva.

Entà optar a d’aguestes ajudes, s’auràn de complir coma mínim es següents requisits: Qu’er alumne, e coma minim un des pairs/mairs, siguen empadronadi en Vielha e Mijaran a dia 1 de gèr de 2020, qu’eth menor age entre 4 e 15 ans, presentar era sollicitud laguens deth tèrme establit, qu’era familha non age cap deute tributari o d’aute tipe damb er Ajuntament de Vielha e Mijaran, e qu’es pairs/mairs siguen ath corrent deth pagament des obligacions tributàries e dera Seguretat Sociau.

Es sollicitants non poderàn superar era renda d’unitat familhara. Es familhes de dus membres non poderàn superar es 21.102€, es familhes de tres membres auràn un limit de 27.711€, es familhes de quate membres 32.870€ e es familhes de cinc membres 37.301€. A compdar des sies membres se higerà 3.282€ per cada nau membre computable. Eth volum maxim d’ingrèssi non poderà excedir de 155.000€ entre toti es membres dera unitat familhara e eth rendiment de patrimòni se limitarà a 1700€.

Toti aqueri interessadi an 30 dies entà presentar era sollicitud de demana dera ajuda en registre der Ajuntament presenciaument en tot demanar ora en telèfon 973640018 o pera sedença electronica https://vielha-mijaran.eadministracio.cat. Era publicacion dera ajuda se trape en Bulletin Oficiau dera Província de Lhèida, atau coma en taulèr d’anoncis e ena plana web der Ajuntament de Vielha e Mijaran.

Ena presentacion dera demana, s’aurà de liurar era sollicitud segons modèl normalizat, damb donades e signatura deth demanant e deth menor, presentacion d’ua fotocòpia deth pair/mair/tutor legau, e en cas de demanants estràngers se poderà presentar eth NIE, eth permís de residéncia o passapòrt. Tanben serà de besonh presentar era declaracion dera renda de 2019 e es donades deth compde bancari e eth titular deth madeish.

Er airau de secretaria avalorarà es sollicituds, e eth listat definitiu serà aprovat pera Junta de Govèrn. Es sollicituds aprovades seràn publicades en taulèr d’Edictes Municipaus e es denegades seràn notificades individuaument.

HÒNT: AJUNTAMENT DE VIELHA E MIJARAN