Tres naui positius hèn a pujar a dètz es infectadi peth coronavirus en Aran

23/03/2020

Era Val d’Aran a enregistrat aué tres naui casi de coronavirus. Ua informacion qu’a comunicat eth servici de vigilància epidemiologica deth Departament de Salut dera Generalitat de Catalunya ath Govèrn d’Aran.

Aguesti tres naui positius s'ahigen as ja confirmadi enquia ara en país, en tot somar un totau de 10 casi. 

Damb ua poblacion de 10.000 abitants, dejà se pot afirmar qu’ena Val d’Aran i a un infectat damb coronavirus per cada mil abitants.

D'aguesti tres naui positius, dus se trapen Espitau Vau d'Aran e eth tresau a estat transportat ar Espitau Arnau de Vilanova de Lhèida.

Ath delà, eth govèrn aranés a informat que des der airau d'atencion primària der Espitau Vau d'Aran, s'amie a tèrme eth contraròtle de setanta persones isolades en sòn abitatge damb simptomatologia respiratòria.

Hè tot just ua setmana qu’era val d’Aran enregistraue eth prumèr positiu en país, e en sèt dies ja ne son 10 es persones afectades. Per aquerò se demane responabilitat ara ciutadania en tot redusir ath maxim es movements ena via publica.

Laura Rodríguez