Un viatge mès a nheuat ena Val d’Aran. Eth territòri viu un des milhors moments a nivèu meteorologic es darrèrs ans pr’amor que dejà a nheuat en diuèrses escadences en Aran, mès sustot, a còtes baishes, que non ère tant d’abituda darreraments.

Des d’aguesta madeisha maitiada a començat a precipitar en forma de nhèu en còtes nautes, e rapidaments a baishat enquia arribar as 700 mètres, perqué era nheuada a arribat enquias poblacions de Bossòst o Les, plaçades en Baish Aran. En Vielha, eth paisatge a tornat a tenhir-se ua jornada mès de color blanc en tot deishar imatges tanplan espectaculares.

En çò qu’a a veir damb era estacion d’esquí de Baqueira Beret, dejà s’an acumulat ath torn de 35 centimètres, totun, eth vent a tornar a aparéisher e pòt auer desplaçat fòrça d’aguesta nhèu, sustot en còtes mès nautes.

Damb aguestes darrères precipitacions, se confirme era tendéncia positiva ena Val entà aguestes hèstes de Nadau que se demore que i pogue auer ath torn d’un 90-100% d’ocupacion a compdar deth dia 26 de deseme enquia passat cap d’an.