Torne a nheuar ena Val d’Aran. Dempús des darrères nheuades en mes de seteme e octobre, a tornar quèir precipitacion en forma de nhèu en territòri qu’a tenhit pendent aguesta jornada era estacion d’esquí de Baqueira Beret.

Es prumèri floquets comencèren a veder-se entà meddia a còtes nautes e baishèc a prumèra ora dera tarde entà poblacions coma Tredòs, Salardú, Bagergue o Unha.  Totun, aguesta còta tornèc a pujar un aute viatge en tot deishar sonque a compdar des 1800 mètres imatges de nhèu assolidades.

Ei per aquerò que, coma se pòt apreciar, sonque eth complèx aranés d’esquí a estat banhat per aguesta preciada capa blanca en tot poder heiredar mès eth terren tà premanir-se tà réber futures precipitacions e se poguen plaçar de forma mès facila en espaci.

Baqueira Beret a anonciat qu’an emplegat es canons tà poder generar mès nhèu e provar-les tanben de cara ar inici dera sason, un començament qu’ei programat entath pròplèu 30 de noveme s’es condicions ac permeten. Enguan era temporada serà longa perqué era finalizacion ei prevista en 21 d’abriu.