ACTUALITAT
Reaccion deth Govèrn d'Aran ar atac d'os de dies endarrèr
Enes pròplèu setmanes s'analizarà eth pelatge e es excrements entà determinar quin exemplar a atacat ath bestiar
Eth Conselh Generau d’Aran trabalhe ena identificacion der os que provoquèc eth prumèr atac dera sason ena Val d’Aran a on moric un boc, un mardan e dues oelhes.
S’an remassat mòstre de pèu e d’excrements que s’an enviat ara Universitat Autonòma de Barcelona, un hèt abituau, a on se determinarà en ues setmanes er exemplar qu’aurie produsit aguesta predacion.
Aguest procediment non s’emplegue sonque quan i a un atac, senon que tanben se hè laguens des competéncies de seguiment der os bru en territòri a on, cada un des ossi identificadi anteriorment, a era sua pròpria ficha e quan se li trape un rastre, s’ahige ar istoriau entà auer controlades es sues peades. Eth govèrn d’Aran explique que, a dia d’aué, non se preneràn mès determinacions pr’amor que dejà i a un protocòu que regule eth grad de perilhositat d’un os en base ara periodicitat damb era qu’ataque as ramats.
Eth ramadèr que patic aguest atac serà indemnizat per part deth Departament de Territòri, Paisatge e Miei Ambient en tot èster confirmat qu’a estat er os er autor d’aguesta pèrta de caps de bestiar.