AUE TV

    ACTUALITAT

    1. AUE TV
    2. ACTUALITAT

    Prumèra amassada dera Comission Bilaterau entre eth Conselh Generau d’Aran e era Generalitat de Catalunya de 2020 ençà

    13/10/2021

    Pendent era amassada non s’a podut concretar eth compliment der acòrd de finançament entre Conselh e Generalitat per çò que hè ath pressupòst de 2021 que demore pendent e eth govèrn aranés a emplaçat ath govèrn catalan a solucionar aguest ahèr damb era major brevetat possible

    Aguest maitin a auut lòc, en Palai dera Generalitat de Catalunya, era amassada dera Comission Bilaterau entre eth govèrn catalan e eth Conselh Generau d’Aran, qu’a estat presidida pera sindica d’Aran, Maria Vergés, e era conselhèra de Presidéncia, Laura Vilagrà, ena qu’an participat tanben eth conselhèr de Territòri, Paisatge e Gestion ambientau, Francés Bruna, era conselhèra de Coneishement e Innovacion, Angelina Cases, eth conselhèr d’Espòrts e Governacion, Amador Marqués, e eth cap dera oposicion, Cesar Ruiz-Canela, atau coma d’auti nauti cargues dera Generalitat. 


    “Pendent aguesta amassada auem reclamat que se complisque damb er acòrd de finançament deth Conselh Generau d’Aran, qu’auem demanat que sigue efectiu entath pròplèu 2022 ja qu’enguan, coma mos an comunicat, non serà possible actualizar-lo” afirmaue era sindica d’Aran, Maria Vergés, que higie que: “auem constituït tanben era Ponéncia de Traspassi e Convènis, un ahèr de vitau importància entath desplegament dera Lei de Regim Especiau d’Aran e des competéncies qu’encara non an estat assomides de forma efectiva peth Conselh, que son era majoria des que recuelh era Lei”. 


    Aguesta Ponéncia de Traspassi a fòrça ahèrs a abordar, coma ei eth cas dera lengua e cultura araneses, ua competéncia que non s’a actualizat der an 1992 ençà, mès tanben era atencion as persones, ahèrs sociaus e benèster, era gestion forestau o es espòrts, entre fòrça d’auti. 


    S’a tramitat tanben eth Decrèt de Traspàs de foncions dera Generalitat de Catalunya ath Conselh Generau d’Aran en matèria de gestion de grani carnivors de fauna sauvatja en Aran, ua competéncia que s’artenhec ena darrèra Comission Bilaterau (celebrada en gèr de 2020) e que permeterà ath govèrn d’Aran èster mès agil e eficient ara ora de solucionar es problematiques des ramadèrs derivades dera convivéncia damb er os. 


    Era sindica d’Aran a volut “arregraïr era volentat deth govèrn catalan entà desplegar era Lei d’Aran e tà encetar ua naua etapa ena relacion bilaterau entre eth Conselh Generau d’Aran e era Generalitat de Catalunya, basada en respècte e era leiautat institucionaus qu’andús govèrns meriten”. 


    HÒNT: CONSELH GENERAU D'ARAN
    Manu Moga
    Tornar