ACTUALITAT
Naut Aran compdarà damb ua naua oficina de torisme
22/12/2024
Era sindica d’Aran, Maria Vergés, e er alcalde deth Naut Aran, César Ruiz-Canela, an signat un convèni de collaboracion en qu’eth Conselh Generau d’Aran apòrte 50.000€ tath bastiment per part der Ajuntament deth municipi d’ua oficina en Salardú e 8.000€ tath cambi d’ubicacion dera actuau caseta d’informacion en Arties. Er Ajuntament de Naut Aran amiarà a tèrme es òbres en tot aportar-i era rèsta de finançament
Eth Conselh Generau d’Aran e er Ajuntament de Naut Aran an signat eth convèni de collaboracion peth quau per un costat, eth municipi retorne a formar part de Foment Torisme Val d’Aran, en tot aportar ara maxima institucion aranesa era taxa toristica corresponenta deth dusau e tresau trimesadèr de cada annada, a diferéncia de çò qu’auie hèt enquia 2023 quan aportaue era part corresponenta ath totau annau des hons recebudi.
Aguesta aportacion se destine en encastre deth sector toristic, e Foment Torisme Val d’Aran s’obligue a invertir-la integrauments en accions concrètes de promocion toristica dera Val d’Aran com er impuls deth torisme sostenible, responsable e de qualitat, era proteccion, era preservacion, era recuperacion e era milhora de recorsi toristics, eth foment, creacion e milhora des productes toristics, era milhora des servicis de contròl e inspeccion sus es establiments e equipaments toristics e eth desvolopament d’infrastructures e servicis restacadi damb eth torisme.
Atau madeish, eth convèni tanben remasse era collaboracion entre andues institucions entath bastiment d’ua oficina de torisme en Salardú qu’eth Conselh Generau d’Aran finançarà damb 50.000€ e que bastirà er Ajuntament de Naut Aran, en tot assomir-ne era rèsta de finançament. En aguest sens, tanben se cambiarà d’ubicacion era actuau caseta d’informacion toristica d’Arties, tara qu’eth Conselh Generau i aportarà 8.000€ annaus.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga