Maugrat es restriccions aplicades un mes ençà peth govèrn dera Generalitat de Catalonha entà pr’amor d’arturar es contagis de Coronavirus, era Val d’Aran a enregistrat pendent es darrèri dies un increment considerable de casi.

En çò que portam de setmana dejà s’an detectat 19 naui positius, un gran aument s’ac  comparam damb es donades dera setmana deth 2 ath 8 de noveme, ena que s’enregistrèren 9 casi. 

Es grops de 4au d’Eso e de dusau de Bachelierat der Institut d’Aran an estat es darrèri en èster confinadi. 

Totun, segontes afirmen des deth Govèrn d’Aran, tot e qu’era incidéncia dera Covid-19 ei nauta en parçan, non s’enregistre pression es Espitau Val d’Aran.

D’ençà er inici dera pandèmia, eth nombre de positius detectadi en Aran s’apròpe as 400, ua donada qu’a d'èster contrastada en tot tier com referéncia era poblacion ena comarca, qu’ei de 10.000 abitants. 

Ath delà, eth parçan a enregistrat un totau de 8 pèrtes personaus, totes eres corresponentes ara prumèra ondada dera pandèmia.