Eth projècte de bièra artesanau REFU a daurit es pòrtes dera sua naua fabrica, plaçada en Bossòst. E ac a hèt en un acte inaugurau a on non a mancat bièra artesanau e bon minjar entà maridar aguestes creacions a basa de lupol e malta. Un eveniment doble, ja qu'era cerveseria REFU a celebrat, ath madeish temps eth sòn ueitau anniversari.

Damb centenats de visitants pendent tot eth dia, era jornada compdèc damb visites guidades as installacions dera fabrica, e musica per part d'un DJ. En aguest establiment se i fabriquen 7 bières artesanaus de forma fixa, mès eth rèpte ei eth de produsir-ne mès de forma puntau.

Aguesta iniciatiua comencèc en 2010 damb eth dauriment deth prumèr establiment REFU en Baqueira, en còta 1500. E contunhèc damb eth locau plaçat en cap dera Vila de Vielha. E dempús de ueit ans, aguesta naua fabrica arribe entà qu’aguest projècte cridat REFU non pare de soniar.

Dempús d'aguesta inauguracion oficiau, era fabrica de Bossòst daurirà es diuendres e dissabtes entà aufrir visites guidades e degustacions des sòns grani tresaurs: es bières artesanaus.