Coma cada 17 de junh, era Val d’Aran a celebrat era sua hèsta nacionau, era que commemòre era reinstauracion deth Conselh Generau d’Aran en 1991.

Ua Hèsta d’Aran presidida peth Sindic deth Govèrn Aranés e peth president dera Generalitat de Catalonha, ena que s’a volut arregraïr eth gran esfòrç amiat a tèrme pes professionaus essenciaus pendent aguesta crisi dera Covid-19 ena que mos trapam.

Personau sanitari, fòrces de seguretat, personau encargat dera limpiesa e desinfeccion, trabalhadors deth transpòrt public o volontaris dera societat aranesa an estat quauqui des collectius as que se li a hèt omenatge.

Es moments de mès emocion, totun, an estat es autrejaments des 8 rams de flors as familhaus des 8 persones qu’aguesta pandèmia s’a portat per dauant ena Val d’Aran.

Per un aute costat, ei dejà tradicion qu’era Hèsta d’Aran sigue ua jornada de reivindicacion. En aguest sens, des deth Conselh Generau s’a hèt ua crida ath besonh d’incrementar eth compromís dera Generalitat en favor der aranés.

Ua lengua qu’en dia dera Hèsta d’Aran sonque a agut paraules de gratitud entara societat aranesa, peth gran esfòrç que cadun, d’ua manèra o ua auta, a hèt entà hèr front ad aguesta batalha comuna. 

FÒRÇA GRÀCIES, ARAN!