ACTUALITAT
Gessen publicades es bases reguladores tara concession d’ajudes de supòrt socioeducatiu
25/07/2024
Er objècte des bases ei regular eth marc generau entara concession d’ajudes economiques individuaus qu’autrege eth Conselh Generau d’Aran, a trauès des Servicis Assistenciaus Integrats d’Aran, entàs escolans/es escolarizats ena Val d’Aran que presenten dificultats sociaus e/o economiques en concèpte de minjador escolar, materiau e activitats socioeducatives
Eth Conselh Generau d’Aran a publicat es bases reguladores tara concession d’ajudes de supòrt socioeducatiu adreçades a escolans e escolanes qu’estúdien en centres publics dera Val d’Aran entath cors 2024/2025.
Damb aguestes bases se vò regular eth marc generau de concession individuau ad aqueri estudiants dera Val d’Aran que presenten dificultats sociaus, economiques o des dus tipes. Es ajudes son en concèpte de minjador escolar, libres e materiau escolar e activitats socioeducatives prescrites pes professionaus des servicis sociaus.
Era ajuda individuau l’a de sollicitar era familha mejançant eth modèl establit ar efècte e er autrejament se determine en foncion des règles deth barèm que fixen aguestes bases e qu’a en compde era situacion dera familha sollicitaira.
Son beneficiaris es escolans qu’estúdien ensenhament infantil e ensenhaments obligatòris enes centres publics ordinaris deth Departament d’Educacion ena Val d’Aran.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga