Eth Sindic d'Aran, Carlos Barrera, dèishe era politica en tot renónciar ara acta de conselhèr

08/06/2019

Carlos Barrera, ara exercint eth cargue de Sindic d’Aran en foncions, a renonciat ara acta coma conselhèr electe peth terçon de Castièro. Ua decision plan personau derivada des resultats des comicis deth 26 de mai, a on CDA sonque artenhec 4 des 13 cagires en jòc deth Conselh.  

Carlos Barrera deisharà era prumèra linha dera politica dempús d’auer dirigit eth Conselh Generau d’Aran pendent 20 ans. En 1995 siguec escuelhut Sindic, cargue qu’ostentarie enquiath 2007, quan es aranesi apostèren per Boya, que governèc Aran pendent ua legislatura. Ja en 2011, Barrera tornèc a guanhar es eleccions ath Conselh Generau d’Aran.

Pera sua part, Anna Díaz, qu'estaue de numèro 2 ena lista des conselhèrs candidats per Castièro, dèishe tanben eth servici politic entà tornar ath sòn trabalh anterior en departament de promocion toristica deth Conselh.

En aguest sens, qui arremassarà era acta de conselheria per aguest partit en terçon de Castièro serà Rosa Mari Salgueiro, era numèro tres.  César Ruiz-Canela, baile e conselhèr de Naut Aran, serà nomentat portavotz de CDA en Conselh dempús dera renóncia de Barrera.

Ath delà, Barrera non volec acomiadar-se sense deishar un messatge clar entath pòble aranés de cara ath futur.

Eth 18 de junh, un dia dempús dera hèsta d’Aran, s'amiarà a tèrme era constitucion deth nau plen deth Conselh Generau d’Aran. Serà aquiu quan paco Boya agarre eth relleu, en tot convertir-se en eth nau Sindic d’Aran.

Laura Rodríguez