Ena amassada mantenguda an estat presents tanben eth secretari generau entath Rèpte Demografic, Paco Boya, es caps dera Demarcacion de Carretères de Catalunya e Aragon, Vicente Vilanova e Rafael López, eth secretari de Mobilitat e Logistica dera Generalitat, Isidre Gavin, eth president dera Deputacion de Lhèida, Joan Talarn, e eth dera Deputacion de Huesca, Miguel Gracia, era presidenta deth Conselh Comarcau dera Alta Ribagorça, Maria José Erta, eth president dera comarca dera Ribagoza, Marcel Iglesias e es alcaldes des municipis aranesi.

En aguesta amassada eth secretari generau a auançat es actuacions previstes ena “Agenda N-230” e a mostrat eth compromís deth Ministèri de Transpòrts, Mobilitat e Agenda Urbana damb es territòris implicadi en aguest ahèr, en tot assegurar que i a ua volontat d’arténher melhores importants ena via e amiar a tèrme un seguiment collectiu entà assegurar era continuitat deth projècte.

Es projèctes previsti en aguesta “Agenda N-230” an ua vision complèta de tot eth corredor, d’Alfarràs enquiara termièra dera Val d’Aran damb França, e son projèctes plantejadi damb eth menor impacte mieiambientau possible. En aguest sens, eth secretari afirmaue qu’era intencion deth Ministèri ei poder auançar en aguest projècte çò de mès lèu possible e que, per aguest motiu, tant bon punt coma s’agen es projèctes aprovadi, anaràn gessent a licitacion entà poder melhorar tant lèu coma sigue possible era carretèra e era qualitat de vida des persones que la transiten.

Cau rebrembar qu’eth passat mes de març, era sindica d’Aran, amassa damb es presidents des deputacions de Huesca e Lleida e es presidents des comarques dera Ribargoça catalana e aragonesa, mantengueren ua trobada de trabalh damb eth Secretari Generau d’Infraestructures ena s’acordèc per part deth Ministèri de Transpòrts, Mobilitat e Agenda Urbana, dessenhar un calendari conjunt d’actuacions e projèctes a amiar a tèrme entara melhora immediata dera carretèra N-230.

Dejà a finaus deth mes de junh, eth Ministèri anoncièc un contracte de servicis entara redaccion deth projècte de condicionament dera N-230 damb trams de tres carrils (carretèra 2+1), concrètaments entre es poblacions de Benabarre e Sopeira. E, aué madeish, eth secretari generau d’Infraestructures visite eth nòste territòri e era localitat de Benabarre, en Òsca, entà presentar es projèctes contempladi laguens dera “Agenda N-230”.

En aguest sens, era sindica a mostrat “era satisfaccion deth Conselh Generau d’Aran deuant eth compromís mostrat per part deth Ministèri deth mes de març ençà, en tot balhar responsa ara reclamacion istorica dera Val d’Aran e des territòris que transite era N-230” e a auançat que: “deth govèrn d’Aran ençà contunharam trabalhant en aguest ahèr e èm a disposicion autant deth Ministèri coma de toti es estaments implicadi entà collaborar e arténher, entre toti, ues infraestructures mès segures e adaptades as besonhs deth territòri”.

Ath delà, Vergés higie que: “aguesti trabalhs se somen as qu’auem iniciat dejà tanben damb era Generalitat de Catalunya en tot arténher eth sòn compromís tar impuls dera Agenda de Mobilitat Sostenibla d’Aran e tara melhora dera C-28, ahèrs enes que trabalham de manèra conjunta, barrant atau eth cercle tà qu’era Val d’Aran transite entà ua mobilitat sostenibla adaptada as besonhs e cambis qu’arriben”.


HÒNT: CONSELH GENERAU D'ARAN