Eth govèrn d’Aran presente era campanha de sensibilizacion der aranés: “L’as ena punta dera lengua”

27/03/2023

Jos eth lèma “L’as ena punta dera lengua, trè er aranés”, eth Conselh Generau d’Aran prebotjarà a trauès des hilats sociaus e enes espacis publics dera Val d’Aran, ua campanha adreçada entara joenessa deth nòste territòri damb er objectiu de hèr era lengua pròpria d’Aran mès present enes relacions entre es nòsti joeni e joenes e enes hilats sociaus, e conscienciar as naues generacions deth papèr tant important que jòguen entara perviuença dera nòsta lengua e cultura

Eth govèrn deth Conselh Generau d’Aran a presentat aguesta tarde era sua naua campanha de sensibilizacion der aranés que, jos eth lèma, “L’as ena punta dera lengua, trè er aranés” sage de impulsar era lengua pròpria d’Aran entre era joenessa deth territòri.


“Era critica situacion que trauèsse era nòsta lengua, requerís accions d’impacte e cercar recorsi nauedosi e motivadors entà apropar er aranés as naues generacions, entà que siguen conscients deth papèr tant important que jòguen ena perviuença dera nòsta lengua e era nòsta cultura”, afirmaue era sindica d’Aran, Maria Vergés, en tot híger que: “en aguesti darrèri ans auem impulsat accions tanplan nauedoses coma era produccion dera sèria ‘Èm çò qu’èm’, mès non deisham de cercar accions entà prebotjar er emplec e normalizacion der aranés, especiaument entre es joeni, e sajar de motivar conductes que hèsquen era lengua pròpria d’Aran mès present enes sues relacions e enes hilats sociaus, coma aguesta campanha, qu’ei era prumèra que se presente dempús de 12 ans, quan en 2011, alavetz tanben des deth govèrn deth Conselh Generau, presentèrem era campanha “Ara mès aranés”.


Aguesta campanha de sensibilizacion, prebotjada peth departament de Lengua e Cultura dera maxima institucion aranesa a trauès der estudi creatiu On!dea, incorpòre anglicismes emplegadi abituaument entre era joenessa entà lançar-les eth messatge dera importància qu’a que mantenguen viua era lengua aranesa e la empleguen de manèra abituau enes sues convèrses.


En totau, era campanha compde damb sies messatges creatius que se lançaràn enes pròplèu dies a trauès des hilats sociaus en format audiovisuau e que se poiràn trapar tanben, mès endeuant, en espacis publics coma es parades d’autobusi o eth madeish Institut d’Aran.


Cau rebrembar qu’eth passat mes d’octobre eth Conselh Generau d’Aran realizèc ues enquèstes lingüistiques entre er escolanat de 4au d’ESO e 1èr de Bachelierat, que revelèren era critica situacion der aranés. Es donades mostrauen qu’er aranés ei era lengua familiara d’un 17,9% des estudiants, un 18,8% declaraue auer er aranés coma lengua d’identificacion e sonque un 2,4% manifestèc qu’era darrèra publicacion en hilats sociaus auie estat en aranés, en tot mostrar un baish e preocupant emplec sociau dera lengua entre era joenessa.


HÒNT: CONSELH GENERAU D'ARAN 
Manu Moga