Eth darrèr Plen der Ajuntament de Vielha e Mijaran doble era partida des retribucions dera equipa de govèrn

26/07/2019

Eth Plen Extraordinari der Ajuntament de Vielha e Mijaran a aprovat era tresaua modificacion deth crèdit deth pressupòst damb era majoria absoluta deth grop d’Unitat d’Aran, mès eth vòt en contra dera oposicion.

En aguesta modificacion, avalorada en mès de 603.000 èuros, s’includís un aument der impòrt deth canon der aigua de 166.000€. Ua quantitat que s'a de pagar ara Agència Catalana de l'Aigua en proporcion ara quantitat d’aigua consumida.

Se contemple, entre d’auti punts, era pujada deth 16% deth sòu deth baile de Vielha e Mijaran. D’aguesta forma, Juan Antonio Serrano passarà de guanhar 41.000 èuros en brut a guanhar-ne 47.800. Quauquarren que non a estat vist damb boni uelhs ena oposicion.

Un aute des punts de discòrdia en plen a estat er hèt de doblar era partida de retribucions ara equipa de govèrn, que passarà de 71.000 euros a mès de 140.000.
En aguest sens, un des còssos que dejà trabalhaue a temps parciau passarà a trabalhar a temps complet, e dues naues còssos seràn remunerades per prestar servici a temps parciau.

Des dera equipa de govèrn, se defen tot eth trabalh existent en consistòri tà milhorar es servicis deth municipi.

Un aute des justificacions que s’hèn des deth govèrn son que aguestes mesures son tostemp en consonancia ara legalitat e que tanben arresponen as circonstàncies personaus des còssos.

Aguesta modificacion en pressupòst tanben contemple era melhora deth 0,25% deth salari deth conjunt des trabalhadors dera administracion, atau coma inversions en òbres e servicis e en airau der ensenhament.
Laura Rodríguez