ACTUALITAT
Eth Conselh Generau d’Aran presente era prumèra web oficiau der aranés
28/03/2023
Aguest nau espaci web ei ua hita fòrça importanta tà dignificar era lengua qu’aufrís tota sòrta de materiaus e servicis en linha entà fomentar eth coneishement e normalizacion dera lengua pròpria d’Aran, damb er objectiu d’impulsar eth sòn emplec e aufrir responsa as dobtes mès abituaus que poguen sorgir sus er aranés entre es usatgèrs e usatgères
Eth Conselh Generau d’Aran a acuelhut aguest maitin era presentacion dera naua web der aranés ena qu’era maxima institucion aranesa, a trauès des airaus de politica lingüistica e sistèmes, trabalhe de hè mesi e que, a compdar d’aué, serà dejà en foncionament. Eth principau objectiu d’aguesta web ei amassar tota era informacion sus era nòsta lengua e prebotjar-ne eth sòn coneishement e normalizacion.
A trauès d’aguest espaci, es visitants dera web poiràn trapar informacion sus era origina dera nòsta lengua, donades de coneishement e emplec lingüistic, normativa legau e reconeishement dera sua oficialitat, emplec ena escòla e enes mieis de comunicacion, etc.
Es usatgèrs dera web se poiràn inscríuer as corsi d’aranés impartidi peth Conselh Generau d’Aran e/o apuntar-se ath Volontariat per aranés, tanben traparàn es servicis de consultes lingüistiques e traduccions e auràn accés as recorsi en linha entà apréner aranés coma diccionaris, traductors automatics o traductors extèrns ath Conselh Generau d’Aran, e ligams d’interès damb contengut escrit e audiovisuau.
“Damb aguesta naua web çò que pretenem deth Conselh Generau d’Aran ençà ei balhar tota era informacion que i a disponibla e verificada sus er aranés en un unic endret e presentar toti es recorsi en matèria de lengua qu’aufrís eth Conselh Generau d’Aran en un madeish espaci web, en tot impulsar atau er emplec e normalizacion der aranés” asseguraue era sindica d’Aran, Maria Vergés, que higie que “aguest ei un auanç istoric tara nòsta lengua e un gran pas tà dignificar-la e balhar-li reconeishement”.
Era naua web der aranés se trape en ua prumèra fasa de desvolopament, çò que vò díder qu’enes pròplèu mesi se trabalharà entà ampliar es sòns servicis e adaptar-se melhor as besonhs des usatgèrs e usatgères.
Manu Moga