ACTUALITAT
Eth Conselh Generau d’Aran concedís eth Prèmi 17 de Junh as centres educatius dera Val d’Aran e es sòns professionaus
16/06/2022
Damb aguest guerdon, eth govèrn d’Aran vò amiar a tèrme un arregraïment ara Escòla Aranesa, coma un des èishi vertebradors dera nòsta societat e element clau entath mantenement de promocion der aranés, atau coma reconeishement ar esfòrç e trabalh des sòns professionaus entà afrontar es ans dera pandèmia
Aguesta tarde a auut lòc er acte d’entrèga des Prèmis Literàris e Prèmis 17 de Junh deth Conselh Generau d’Aran, un acte en quau era sindica d’Aran, Maria Vergés, a volut hèr especiau èmfasi ena delicada situacion que trauèsse era nòsta lengua pròrpria: “er aranés viu ua situacion d’extrema gravetat e a arribat era ora d’estar-ne conscients e actuar damb rapidesa e, tanben, damb fermesa. Er emplec sociau dera nòsta lengua, segontes es donades dera darrèra enquèsta d’usi lingüistics, non arribe ath 20%. Ei a díder, er aranés se trape ath limit dera sua superviuença, e tot e qu’eth coneishement reglat dera lengua a aumentat, aguest aument non se traslade en un emplec en carrèr de forma abituau”.
En sòn discors, era sindica destacaue que “tà evitar era mòrt dera nòsta lengua ei de besonh compdar damb recorsi e mieis damb es qu’actuaument non compdam, e tanben damb complicitat politica e institucionau e damb militància sociau. Ei per aquerò que coma sabetz, deth govèrn deth Conselh Generau d’Aran auem sollicitat ara Generalitat de Catalunya, per un costat, era revision deth traspàs competenciau en matèria de lengua e cultura entà actualizar-lo, pr’amor qu’en mès de 30 ans non s’a revisat, e per aute, reajustar era relacion entre Conselh e Generalitat entà possar eth lideratge deth Conselh Generau d’Aran en aguesta matèria”.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga