Eth Centre de Prediccion de Lauegi d’Aran participe en ISSW

10/10/2018

Es tecnics deth Centre de Prediccion de Lauegi deth Conselh Generau d’Aran participen enquiath 12 d’octobre en International Snow Science Workshop (ISSW) 2018 que se celèbre ena ciutat d’Innsbruck.

Aguesta ei era conferéncia mès grana deth mon sus nhèu e lauegi, a era i assistissen ath torn de 1.000 participaires de disparières nacionalitats, e promò un escambi internacionau e interdisciplinari entre expèrts dera nhèu, damb tematiques coma es auanci actuaus ena sciéncia dera nhèu e es lauegi, es estudis de cas e es tecnologies innovadores a nivèu internacionau.

En ISSW se tracten ahèrs coma mesures de proteccion, pronostic e dinamica de lauegi, maneig dera nhèu, atau coma estrategies de guida, rescat e risc. Ath delà, s'enfoque en tèmes especiaus coma “Solucions integraus d'engenharia”, “Accidents de laueg” e “Prener decisions sus eth terren”.

Per prumèr còp, enguan eth congrès aufrís corsi de capacitacion entà toti es participaires interessadi.

Es intervencions des tecnics deth Centre de prediccion de Lauegi d’Aran seràn sus “Reanalisi d’accidents de lauegi recents ena Val d'Aran: Ua comunicacion de provocacion entà diferenti grops d'usatgèrs”, de Jordi Gavaldà; “Mapeig ATES e Laueg. Problèmes enes accidents de lauegi e Close-calls ena Val d'Aran” de Ivan Moner: e “Exposicion deth terren enes lauegi, cartografia a escala enes Pirenèus: Un projècte en expansion” a cargue de Montse Bacardit.

IMATGE: CONSELH GENERAU D'ARAN
Clara Villar