Es dus grads negatius non an empedit qu'ua multitud de mainatges e pairs aranesi s'apropèssen ara plaça dera glèisa de Vielha entà autrejar es sues cartes as patges des reis d'Orient.

A compdar des 7 dera tarde e enquias 9 dera net, dus patges sigueren es encargadi d'arrecuélher es cartes e demanar, de pas, s'es mainatges s'auien portat ben pendent er an.

Ues cartes plees de desirs que segur que se compliràn arribat eth maitin magic deth 6 de gèr.

Era coa entà autrejar es cartes, qu'anaue mès enlà dera glèisa, demostraue qu'arren pòt obstaculizar es illusions des mès petiti.

Es patges des Majestats d'Orient se daràn prèssa entà mandar totes es cartes des mainatges aranesi, ja qu'era net deth 6 de gèr ei a tocar.

Arrebrembam qu’eth dissabte 5 de gèr, a compdar des 6 dera tarde, se celebrarà era cavaucada de Vielha. Atau, es Reis gesseràn de Gausac, en tot recórrer eth centre dera localitat e arribar en Ajuntament de Vielha e Mijaran. Un còp aquiu, eth rei Melchor harà un petit discors e es 3 reis d’Orient saludaràn ara mainadèra.

Es cavaucades des Reis Mags tanben se celebraràn en d’auti pòbles, coma Bossòst, Les, Arties o Salardú.