Eth parc de fauna sauvatja dera Val d'Aran, Aran Park, a acuelhut ua jornada divulgativa entà conéisher mès a hons es arrats dromilhèrs grisi ena Val d'Aran. Aguesta comarca resulte vertadièraments atractiua entara espècia gràcies ara sua riquesa de bòsqui caducifòlis. Aguesta activitat, organizada peth Conselh Generau d’Aran, a compdat damb ua session teorica, a on es assistents an aprenut tot çò que hè referéncia ad aguesti petiti mamifèrs. Per exemple, s'i a parlat sus era sua alimentacion e eth sòn procès de cria.

Era dusau part dera activitat a consistit a verificar s'es 5 caishes nin installades en Aran Park an estat escuelhudes pes arrats dromilhèrs entà auer e suenhar es sues cries. Eth resultat, positiu: s'i an trobat un mascle, dues femelhes e cinc cries. En aguest sens, ena Val d'Aran i a un totau de 30 caishes nin repartides entre Aran Park, Montgarri, era Honeria, Betren e Es Bòrdes.

E, tot siga dit, dempús d'aguesta activitat, ja s’a trapat era logica ath refran "dromir coma un arrat dromilhèr" e ei qu'aguesti animaus pòden iuernar enquia 8 mesi ar an.